اول مره اكتب تدوينه وحتكون اجمل تدوينه عشان حتكلم عن شئ من اجمل الاشياء الي صارت في حياتي
"مسرع الاعمال"
في يوم من الايام اتصلت عليا صاحبتي وقالتلي : عهود في برنامج اسمو مسرع الاعمال ايش رأيك نشترك في ؟
وانا ما كان عندي اي معلومة عنو اطلاقا , قلتلها ايش دا مسرع الاعمال قالتلي برنامج يسرع اي مشروع يكون عندك ويطلعوا على ارض الواقع , قلت : والله شئ جميل يلا نشترك.
وفي يوم 28-8-2013 جاني ايميل من البرنامج انو لازم اعبي اسئلة عشان اتأهل للمقابلات الشخصية , عبيت الاسئلة وارسلتها وانا دا كلو مني عارفة ايش هو مسرع الاعمال .
مر على دا الايميل يمكن اكتر من شهر ونسييييت الموضوع ويوم 2-10-2013 بعد الضهر وانا في مكالمة مع شخص اتفاءل جدا بي واعتبروا وجه الخير عليا , يجيني ايميل من المسرع بالتأهل للمقابلات الشخصية مرا فرحت وفي نفس الوقت برضو مني عارفة ايش الهرجة.
يوم 5-10-2013 روحنا على بركة الله المقابلة وكل البنات كانوا ميتين خوف وانا مازلت مني مستوعبة اقلهم اشبكم خايفين ترا عادي ايش يعني مقابلة ناس زينا زيهم , كان الوضع حلو وحسيت نفسي كاني في ارب قوت تالنت وانا بدخل على لجنة التحكيم .
كل البنات لمن دخلو للجنة طبعا ميتين خوف وكانوا يشرحوا وهما واقفين , لمن دخلت انا قلتلهم ممكن اجيب كرسي اجلس ولمن جلست وشفتهم ماشاءالله جاني الخوف , انطلقت في شرح المشروع بكل ثقة بدأوا يسألوني واجاوب على كل سؤال سألني اسامة اذا عندي مشروع تاني انصدمت انو كيف يعرف عن مشاريعي التانية والين دحين ما اعرف كيف كان عارف شرحت مشروعي التاني وما كنت محضرتلو اي شئ , صاروا أسامة و زياد وهبه يقولولي انتي مخترعة منتي ريادية وانا لا والف لا واعابطهم, هاشم الوحيد الي كان مستمع ودعم مشروعي بكلمتين , زياد قلي انو مسرع 1 جو مخترعين وما قدروا يكونوا ريادين قلتلو ابا اسالك سؤال الريادي ايش يحتاج عشان يسوق لفكرتو بأفضل طريقة , قلي ايش ؟!, قلتلو فكرة خلاقة ومبتكرة , والافكار المبتكرة والخلاقة تكون عند المخترع ,خلص وقت المقابلة وخرجت ,وكل البنات انفجعوا انو جلست في المقابلة 40 دقيقة والمفروض 5 دقايق .
بعدها صرت متحمسة اكتر اني اكون متواجده معاهم واكون واحدة من المشتركين وبعد شهر 6-11-2013 وصلني ايميل منهم انو تم قبولي ولازم احضر اليوم التعريفي , في اليوم التعريفي بدأت استوعب لمن قالو انو الي قدموا للمسرع اكتر من 300 والي انقبل بس 42 وقتها فهمت قد ايش انا في مكان جدا مهم , كل مدرب بدأ يعرف عن نفسو وايش يقدملنا في المسرع وشرحوا بالتفصيل ايش هو المسرع واتحمست اكتر , قالولنا انو حتصير تصفية كلنا اتفجعنا ورفضنا الموضوع الا قالولنا انو انتو الي حتنسحبو وتقرروا تتصفوا.
بدأنا ورشات العمل اول الورشات كانت مع زياد , زياد من اكتر الناس المحفزين والمتفائلين كنا في الورشة نسمعلوا بكل حماس وما كنا نتمنى انو تخلص الورشة ابدا , وصلنا باحلامنا وافكارنا الى ابعد من السما.
جانا خبر انو لازم نختار مدرب لنا من الاربعة المدربين كان اصعب قرار جلست افكر وافكر واتذكرت يوم المقابلة الشخصية وكيف لمن هاشم دافع عن فكرتي وقلت حختاروا اكيد هوا حيفهم كيف انا افكر .
وهاشم اصر علينا انو نكون فرق وانا كنت من اشد المعارضين واضارب مع هاشم اني ما احتاج شريك او فريق عمل في مشروعي .
بعدها بدأت ورشات اسامة , افتكر اسامة قال كلمة ما انساها , قلنا: زياد طلعكم السما وانا حنزلكم تاني الارض. بدأنا مع اسامة ننكرف وننضغط بدأ الجد والشغل ولازم نسلم في الوقت المعين واجبات جامعة وتكاليف المسرع اتعلمنا كيف ننظم الوقت من الاخر اسامة علمنا ايش يعني الوقت كالسيف وعلمنا معنى الوقت.
وقتها بدأوا البنات يتعرفوا على بعض اكتر وكان شغلهم الشاغل "مين الي حيوصل للنهاية" سؤالهم الدائم ,
بعدها جانا ياسر بهجت عشان نبدأ نسوي النموذج الاولي لمشاريعنا والبنات وقتها كانو في حالة استنفار من ضيق الوقت بس مع دا كلو انجزوا .
ورجعنا تاني لورشات عمل هاشم و اسامة كانت الورشة الي من اكتر الورشات الي ما انساها سوينها فيها الخطة التشغيلية وكانت من الورشات المكدسة بالمعلومات وقتها حسيت قد ايش مشروعي ما ينفع يكمل , وقتها كنت بين قرارين يا اني انسحب او اني ادور فكرة تانية.
بعدها اشتغلت على فكرة تانية نتجت من جلسة بناتية نهاية الورشة حبيتها واديتها كل وقتي واشتغلت حق شهر خلال 4 ساعات ,
وفجأة...
يوصلني ايميل انو ممنوع تغير المشاريع بعد ورشة العمل دي , انا وقتها في حالة صدمة ابكي ولا ايش اسوي بس انا قيدي اشتغلت وسويت يعني مني متأخرة , روحت وقلتلهم اني غيرت الفكرة والحمدلله كملت فيها.
بعدها جاني ايميل تاني وصدمني اكتر واكتر تقييم لافكار المشاريع وكنت مصنفة من ضمن الي مشاريعهم على حركرك زعلت ورحت سالتهم ليش قالولي انو قيموني على فكرتي القديمة .
في جلسة التوجيه بدأت اشرح لهاشم الفكرة الجديدة هاشم يبا الزبد وكيف حجيب فلوس ماكان مقتنع بمصادر دخلي وزعلت مرررا اني مني قادرة اوصلوا الفكرة .
وتتابع الصدمات ويعلنوا عن التوب 20 الي حيكملوا للنهائي وما يكون اسمي من ضمنهم اول شئ قلتلو ان لله وان اليه راجعون اللهم اجرني في مصيبتي واخلف لي خيرا منها .
كلمت شريكي وشريك نجاحي وانجازاتي طراد باسنبل قلتلو يوم السبت 4-1-2014 لازم تجي عشاااان نعرض فكرتنا وما قلتلوا عن التقييم الا بعد ما وصل , قمنا وعرضنا فكرتنا وكل القاعة اتحمست وكان من اسسعد اياااام حياتي كانت سعادتي وقتها ابدا ما تنوصف بكلمة وقدرنا نثبت مشروعنا ووقتها آمنت وبشدة اهمية فريق العمل والشريك .
بعدها رجعوني للتوب 20 ويوم 11-4-2014 عرضنا العرض النهائي عشان نتأهل للعرض على المستثمرين وبنستنى النتايج.
في النهاية مسرع الاعمال سواء عرضنا على المسثمرين ولا ما عرضنا ننحن فايزين بمجرد معرفتنا بالمادة العلمية والخبرة والتجارب الي اخدناها , كفاية انو اتعرفنا على ناس حسيناهم كأنهم عيلتنا , كفاية طعم فرحة التعب والانجاز الي حاسينها , كفاية تغيير فكرنا ونظرتنا لكل شئ من حولنا .
اسامة القائد الملتزم يسمع للكل وما يحب احد يخالف القوانين , هاشم شخصية جدية جدا و اول سؤال يسألوا لاي مشروع "فين الفلوس"
هبه القللللب الحنونن للبنات ياما سمعت مشاكلنا الين داخت واخيرا زياد المشجع المتفاءل الملهم راحة عجيبة لمن الواحد يتكلم معاه.
مسرع الاعمال حبيييتو لدرجة اني ايام اخرج من البيت 6 ونص الصباح على الجامعة في جدة على مكة على المسرع وما ارجع البيت الا 10 في الليل.
مسرع الاعمال مافي شئ يوفي, وجميل كل المدربين ووقفتهم معانا بالرغم اننا كنا نعصب منهم ونكرهم بس نرجع ونعرف انو نظرتهم ابعد من تفكيرنا شكرررررا لكم ومن مكة للعالم .
ليست هناك تعليقات:
إرسال تعليق